पुणे : ‘शुक्ल यजुर्वेदिय माध्यंदिन महाराष्ट्रीय ब्राह्मण मध्यवर्ती मंडळाच्या याज्ञवल्क्य उद्योजक विकास अभियानाच्या (युवा) अकराव्या वर्धापन दिनानिमित्त चंद्रकांत जोशी यांच्या स्मरणार्थ दिला जाणारा ‘युवा उद्योजक पुरस्कार’ यंदा महाभृंगराज तेल कंपनीचे गणेश कुलकर्णी आणि केदार कुलकर्णी यांना, तर सृजन आर्ट गॅलरी पुरस्कृत ‘सृजन युवा पुरस्कार’ गायिका बेला शेंडे यांना देण्यात येणार आहे,’ अशी माहिती ‘युवा’चे श्रीकांत जोशी यांनी पत्रकार परिषदेत दिली. या वेळी सृजन आर्ट गॅलरीचे चारुहास पंडित, मंजुषा वैद्य, तृप्ती नानल, मिलिंद दार्वेकर आदी उपस्थित होते.
‘पुरस्कार वितरण सोहळा येत्या शुक्रवारी, १८ ऑक्टोबर २०१९ रोजी सायंकाळी ५.३० वाजता टिळक स्मारक मंदिरात होणार आहे. या सोहळ्यासाठी प्रमुख पाहुणे म्हणून उद्योजक श्रीकृष्ण चितळे, आमदार मेधा कुलकर्णी आदी उपस्थित राहणार असून, मंडळाचे अध्यक्ष उमाकांत जोशी, कार्याध्यक्ष विश्राम कुलकर्णी आदी मान्यवरदेखील या वेळी उपस्थित राहणार आहेत,’ असेही श्रीकांत जोशी यांनी सांगितले.